رحيلكِ آلمني .. وأحرق مهجتي ..

كانت تحبني حيل ….

لدرجة إنها كانت تقول ليتك بنتي ..!

و تقول لي بعد وبإستمرار ” إذا كانت عندك حصة فاضيه تعالي عندي ..؟

 

ماراح أنسى ذاك اليوم وأنا بالصف الثاني متوسط اللي رجعنا فيه للمدرسة بعد إجازة العيد ..

طلبتني في وحده من الحصص عشان تسلم علي وتبارك لي بالعيد ..

 

بالنسبة للمرحلة الثانوية وبالصف الأول بالتحديد كانوا  يخيرونا بين  الفنية والتدبير المنزلي والتفصيل ..

 وهي كانت معلمة الفنيه ..

كانت تقول “مالي شغل مو على كيفها تختار أنا أبيها عندي”

هي تعرف إني وش كثر أحبها وأعزها ..

بس أنا ماكنت أحب الفنية ولاأحب التفصيل … أبي التدبير

ردت شيخة معلمة التفصيل وقالت : لاااااا أنا أبيها عندي

أما تغريد معلمة التدبير قالت : الله يعينك حتى أنا أبيك ….بس لازم نسوي قرعة “

صلحت القرعة ثلاث مرات .. طلع لي تفصيل ..!!

تغيرت ملامح وجهها وقالت يالله خيره ..

 

مرت الأيام .. وكل ماتشوفني تاخذني بحضنها ..

وتسألني عن أحوالي ..

حتى كانت تدلعني ماتناديني باسمي نهائياً ..

 

 

كانت تتوقع مني في أي وقت أطلب رقمها … بس والله إني كنت أستحي منها مره

وهذا اللي منعني أطلبه  ..

 

حتى جاء يوم التخرج من الثانوية ..

كنا في أجواء كئيبة جداً كلها بكاء  .. ماكأننا متخرجين

 

معلماتنا كانوا قمة في العطاء ..

ومراره فراقهم طغت على فرحة التخرج ..

لدرجه إنهم بكوا أكثر منا في هذا اليوم ..

 

الله يذكرهم بالخير ويسعدهم وين ماكانوا ..

ويجمعني بهم في جنته ..

 

ماشفتها أو بمعنى ثاني ماتذكرتها ..

جات عيني في عينها …

وصارت دموعها ما توقف ..

تقول كيف تخلينا وتروحي ..؟!

وأخذتني بحضنها وشدت علي بقوه ..

ودعتها..

 وسطرت هالكلمات في شهادة تخرجي :

 

” وفقك الله ورعاك .. وسدد على طريق الخير خطاك .. وفرحنا الله بك في الدنيا والأخره “

                                                                          فايزة الحربي ..

 

 

سمعت وأنا بآخر مستوى لي إن بنتها سجلت بالجامعه

كان ودي أشوفها وأسلم عليها

بس ماقابلتها نهائيا..

ولاأعرفها أصلاً .. لأنها مادرست معنا بنفس المُجّمع .

ترددت في طلب رقمها كم مرة

بالرغم ان وحده من صديقاتي قالت إذا تبين جبته لك ..

لأنها حست إني إشتقت لها واجد ومع ذلك .. ماأخذت رقمها …

 

لحد ماجاء ذاك اليوم …

 

 

جاتني الرساله ع جوالي بس كنت مشغوله وعندنا ضيوف ومافتحتها

شوي وألاقي اتصال من وحده من صديقاتي ..

رديت عليها صوتها ماعجبني نهائيا ..

أقول لها وش فيك ..تكلمي ..

قالت : قرأتي الرساله ؟

قلت : لااااا قولي اش فيها .. الله يخليك

رفضت تتكلم .. وكانت خانقتها العبره ..

قلت : طيب أقرأها وأتصل عليك ..

 

 قرأتها كذا مره

مو مصدقه نهائيا ..

 

ماتت فايزه ياعالم ..

ماتت الغالية ..

ليتني كلمتك .. وإلا طلبت رقمك ..

 

الدنيا إنقلبت ع راسي ..

صرت أشوفها بمنامي كثير ..

” الله يخليك تكلمي..قولي شيء .. أبي أتأكد إن هالخبر مو صحيح  .. “

أبي أحد يقوول : فايزه حيه ماماتت …!!!

 

مااستوعبت في البدايه ..

لكن ألحين وبعد مرور سنه على وفاتها..

 خلااااااااص تأكدت ان فايزه صارت تحت الأرض ..

فايزه ماعد لها وجود ..

 

فايزه أنا قصرت معك كثير بس ماراح أقصر بدعائي لك

فايزه والله إني أحبك ..

أسأل الله أن يجمعني بك في جنته .. تحت ظل عرشة الكريم

أخوة متحابين فيه ..

 

أستاذتي فايزه

رحيلكِ آلمني .. وأحرق مهجتي ..

وماراح أنساك من الدعاء ماحييت …..!!